ԿԱՐԳԱՎՈՐՈՂ ԿԱՐԳԱՎԻՃԱԿԻ ԵՎ ԻՐԱՎԱԿԱՆ ՏԵՂԵԿԱՏՎՈՒԹՅԱՆ ՀԱՅՏԱՐԱՐՈՒԹՅՈՒՆ

Վերջին թարմացում՝ 01.07.2026թ.

1. Ընդհանուր դրույթներ

1.1. Սույն Կարգավորող կարգավիճակի և իրավական տեղեկատվության հայտարարությունը, այսուհետ՝ Հայտարարություն, ներկայացնում է OurExchangeClub ապրանքային նշանի ներքո գործունեություն իրականացնող «ՅՈՒՆԻԹՐԵՅԴ ԻՆՏԵՐՆԵՅՇՆԼ» սահմանափակ պատասխանատվությամբ ընկերության իրավական նույնականացման տվյալները, գործունեության կարգավորող շրջանակը, ընթացիկ կարգավիճակը և կիրառելի սահմանափակումները։

1.2. Հայտարարության նպատակն է Օգտատերերին և այլ շահագրգիռ անձանց տրամադրել հստակ, ճշգրիտ և չմոլորեցնող տեղեկություններ Ընկերության իրավական կարգավիճակի և գործունեության բնույթի վերաբերյալ։

1.3. Հայտարարությունը հանդիսանում է տեղեկատվական և հրապարակային բացահայտման փաստաթուղթ և չի հանդիսանում հրապարակային օֆերտա, ծառայությունների մատուցման ինքնուրույն պայմանագիր, ներդրումային առաջարկ, անհատական խորհրդատվություն կամ որևէ գործարքի արդյունքի երաշխիք։

1.4. Հայտարարությունը կիրառվում է Ընկերության Օգտագործման պայմանների և հրապարակային օֆերտայի, Գաղտնիության քաղաքականության, Հաճախորդի նույնականացման՝ KYC, ՓԼ/ԱՖ դեմ պայքարի և պատժամիջոցների քաղաքականության, Կրիպտոակտիվների ռիսկերի բացահայտման հայտարարության և Կայքում հրապարակված այլ փաստաթղթերի հետ համատեղ։

1.5. Հայտարարության և Ընկերության որոշակի ծառայությունը կամ իրավահարաբերությունը հատուկ կարգավորող փաստաթղթի միջև տարբերության դեպքում կիրառվում է տվյալ իրավահարաբերությունը հատուկ կարգավորող փաստաթուղթը, եթե Հայաստանի Հանրապետության օրենսդրությամբ այլ բան նախատեսված չէ։

2. Ընկերության նույնականացման տվյալները

2.1. OurExchangeClub հարթակը շահագործվում է Հայաստանի Հանրապետությունում գրանցված «ՅՈՒՆԻԹՐԵՅԴ ԻՆՏԵՐՆԵՅՇՆԼ» սահմանափակ պատասխանատվությամբ ընկերության կողմից։

2.2. Ընկերության տվյալներն են՝

• Իրավաբանական անվանում՝ «ՅՈՒՆԻԹՐԵՅԴ ԻՆՏԵՐՆԵՅՇՆԼ» ՍՊԸ,
• Պետական գրանցման համար՝ 273.110.112229,
• Հարկ վճարողի հաշվառման համար՝ 02825175,
• Գործադիր տնօրեն՝ պարոն Ավետիս Վարոսյան,
• Իրավաբանական հասցե՝ Հայաստանի Հանրապետություն, ք. Երևան, 0002, Թումանյան 31/3,
• Կայք՝ ourexchange.club,
• Էլեկտրոնային փոստ՝ info@ourexchange.club,
• Հեռախոսահամար՝ +374 94 048 044։

2.3. OurExchangeClub-ը Ընկերության կողմից օգտագործվող ապրանքային նշանն է և Կայքում ներկայացվող ծառայությունների առևտրային անվանումը։

2.4. OurExchangeClub անվանումը չի հանդիսանում Ընկերությունից առանձին իրավաբանական անձ և ինքնուրույն իրավունքներ կամ պարտավորություններ չի ստանձնում։

2.5. Ընկերության պետական գրանցումը Հայաստանի Հանրապետության իրավաբանական անձանց պետական ռեգիստրում ինքնին չի հանդիսանում ֆինանսական կամ կրիպտոակտիվներով ծառայություններ մատուցելու լիցենզիա և չպետք է մեկնաբանվի որպես Հայաստանի Հանրապետության կենտրոնական բանկի կողմից տրված թույլտվություն։

3. Կիրառելի կարգավորող շրջանակը

3.1. Ընկերությունն իր գործունեությունը կազմակերպում է Հայաստանի Հանրապետության կիրառելի օրենսդրության շրջանակում, այդ թվում՝ հաշվի առնելով՝

1. «Կրիպտոակտիվների մասին» Հայաստանի Հանրապետության օրենքը,
2. փողերի լվացման և ահաբեկչության ֆինանսավորման դեմ պայքարը կարգավորող օրենսդրությունը,
3. անձնական տվյալների պաշտպանությունը կարգավորող օրենսդրությունը,
4. անկանխիկ գործառնությունների, վճարահաշվարկային հարաբերությունների և կանխիկ գործառնությունների նկատմամբ կիրառելի պահանջները,
5. հարկային, հաշվապահական և սպառողների իրավունքների պաշտպանության նկատմամբ կիրառելի պահանջները,
6. Հայաստանի Հանրապետության կենտրոնական բանկի՝ կիրառելի նորմատիվ իրավական ակտերը,
7. Ընկերության գործունեության նկատմամբ կիրառելի այլ իրավական ակտերը։

3.2. Հայաստանի Հանրապետությունում կրիպտոակտիվների հրապարակային առաջարկի և կրիպտոակտիվներով ծառայությունների մատուցման կարգավորումն ու վերահսկողությունն իրականացնում է Հայաստանի Հանրապետության կենտրոնական բանկը։

3.3. Կրիպտոակտիվներով ծառայությունների այն տեսակները, որոնց իրականացման համար օրենքով պահանջվում է Հայաստանի Հանրապետության կենտրոնական բանկի գրանցում և լիցենզիա, կարող են մատուցվել միայն համապատասխան իրավական հիմքի առկայության դեպքում։

3.4. Ընկերության կողմից կիրառելի օրենսդրությանը, համապատասխանության ապահովման պահանջներին կամ ռիսկերի կառավարման ընթացակարգերին հետևելը չի նշանակում, որ Ընկերությունը լիցենզավորված ֆինանսական կազմակերպություն է։

4. Ընկերության ընթացիկ կարգավորող կարգավիճակը

4.1. Սույն Հայտարարության վերջին թարմացման օրվա դրությամբ Ընկերությունը Հայաստանի Հանրապետության կենտրոնական բանկի կողմից որպես կրիպտոակտիվներով ծառայություններ մատուցող անձ գրանցված և լիցենզավորված չէ։

4.2. Ընկերությունը չի ներկայացնում իրեն որպես՝

1. Հայաստանի Հանրապետության կենտրոնական բանկի կողմից լիցենզավորված կրիպտոակտիվներով ծառայություններ մատուցող անձ,
2. բանկ,
3. վարկային կազմակերպություն,
4. ներդրումային ընկերություն,
5. կարգավորվող շուկայի կամ կրիպտոակտիվների առևտրային հարթակի լիցենզավորված օպերատոր,
6. ներդրումային ֆոնդ կամ ներդրումային ֆոնդի կառավարիչ,
7. ակտիվների կառավարիչ,
8. վճարահաշվարկային կազմակերպություն,
9. էլեկտրոնային փող թողարկող,
10. պահառու կամ դեպոզիտարիա,
11. ֆինանսական, ներդրումային, իրավաբանական կամ հարկային խորհրդատու։

4.3. Ընկերության կայքում գրանցվելու, նույնականացում անցնելու, օգտահաշիվ ունենալու կամ Ընկերության հետ գործարք իրականացնելու հանգամանքը չի նշանակում, որ Օգտատերը օգտվում է բանկի, ներդրումային ընկերության կամ այլ լիցենզավորված ֆինանսական կազմակերպության ծառայություններից։

4.4. Ընկերությունը չի օգտագործում «լիցենզավորված», «Կենտրոնական բանկի կողմից հաստատված», «Կենտրոնական բանկի կողմից երաշխավորված» կամ համարժեք նշանակություն ունեցող ձևակերպումներ, քանի դեռ համապատասխան կարգավիճակը պաշտոնապես չի տրամադրվել իրավասու մարմնի կողմից։

4.5. Ընկերության կողմից լիցենզավորման համար անհրաժեշտ նախապատրաստական, կազմակերպական, իրավական, տեխնիկական կամ ներքին աշխատանքների իրականացումն ինքնին չի նշանակում, որ լիցենզավորման դիմում ներկայացվել, ընդունվել կամ բավարարվել է։

4.6. Ընկերությունը կարող է հրապարակել լիցենզավորման դիմում ներկայացնելու կամ լիցենզավորման գործընթացում գտնվելու մասին տեղեկություն միայն այն դեպքում, երբ առկա է այդ փաստը հաստատող պաշտոնական և ստուգելի փաստաթուղթ։

5. Անցումային կարգավորում

5.1. «Կրիպտոակտիվների մասին» Հայաստանի Հանրապետության օրենքը ուժի մեջ է մտել 2025 թվականի հուլիսի 4-ին։

5.2. Օրենքի ուժի մեջ մտնելու օրվա դրությամբ Հայաստանի Հանրապետության տարածքում կրիպտոակտիվներով ծառայություններ մատուցած անձանց համար օրենսդրությամբ նախատեսվել է անցումային ժամկետ՝ Հայաստանի Հանրապետության կենտրոնական բանկում որպես կրիպտոակտիվներով ծառայություններ մատուցող անձ գրանցվելու և համապատասխան լիցենզիա ստանալու համար։

5.3. Կիրառելի անցումային կարգավորման համաձայն՝ համապատասխան անձինք պետք է մինչև 2027 թվականի հունվարի 31-ը գրանցվեն և լիցենզավորվեն Հայաստանի Հանրապետության կենտրոնական բանկի կողմից կամ դադարեցնեն լիցենզավորման ենթակա ծառայությունների մատուցումը և դրանց առաջարկը, եթե տվյալ ծառայությունների շարունակման համար այլ իրավական հիմք առկա չէ։

5.4. Ընկերությունն իր գործունեությունը կազմակերպում է կիրառելի անցումային դրույթների, գործող սահմանափակումների և կարգավորող պահանջների հաշվառմամբ։

5.5. Սույն բաժինը չի հանդիսանում հայտարարություն առ այն, որ Հայաստանի Հանրապետության կենտրոնական բանկը հաստատել, հավանության է արժանացրել կամ այլ կերպ ճանաչել է Ընկերության՝ անցումային կարգավորումից օգտվելու իրավունքը։

5.6. Ընկերության իրավական կարգավիճակը կարող է փոփոխվել՝ պայմանավորված օրենսդրական փոփոխություններով, Հայաստանի Հանրապետության կենտրոնական բանկի որոշումներով, լիցենզիայի տրամադրմամբ, մերժմամբ, գործունեության վերակազմակերպմամբ կամ այլ իրավական հանգամանքներով։

6. Ընկերության կողմից ներկայացվող ծառայությունների բնույթը

6.1. Կայքում հրապարակված պայմանների և տվյալ պահին հասանելի տեխնիկական հնարավորությունների շրջանակում OurExchangeClub-ը կարող է Օգտատերերին առաջարկել կրիպտոակտիվների գնման կամ վաճառքի գործարքներ ստեղծելու և իրականացնելու հնարավորություն։

6.2. Յուրաքանչյուր ծառայության կամ գործարքի հասանելիությունը որոշվում է՝ հաշվի առնելով՝

1. կիրառելի օրենսդրությունը,
2. Ընկերության ընթացիկ կարգավորող կարգավիճակը,
3. Օգտատիրոջ նույնականացման և ստուգման արդյունքները,
4. պատժամիջոցների և ՓԼ/ԱՖ դեմ պայքարի պահանջները,
5. միջոցների և կրիպտոակտիվների ծագման ստուգումը,
6. գործարքի նպատակը և տնտեսական իմաստը,
7. Ընկերության ներքին սահմանաչափերն ու ռիսկերի կառավարման չափանիշները,
8. տեխնիկական և գործառնական հնարավորությունները։

6.3. Ընկերությունն իրավունք ունի չառաջարկել, սահմանափակել, ժամանակավորապես կասեցնել կամ դադարեցնել որևէ ծառայություն, եթե դա անհրաժեշտ է օրենսդրության, կարգավորող պահանջների, անվտանգության, համապատասխանության ապահովման կամ ռիսկերի կառավարման նպատակներով։

6.4. Կայքում ծառայության, գործառույթի, կրիպտոակտիվի կամ վճարման եղանակի տեխնիկական ցուցադրումը ինքնին չի երաշխավորում դրա հասանելիությունը յուրաքանչյուր Օգտատիրոջ կամ յուրաքանչյուր գործարքի համար։

6.5. Յուրաքանչյուր գործարքի նկատմամբ կիրառվում են գործարքը ստեղծելու և հաստատելու պահին Կայքում հրապարակված պայմանները, փոխարժեքները, վճարները, միջնորդավճարները, սահմանաչափերը և այլ էական պայմանները։

7. Ընկերության կողմից չմատուցվող ծառայությունները

7.1. Եթե Կայքում և կիրառելի պայմաններում ուղղակիորեն այլ բան նախատեսված չէ համապատասխան իրավական հիմքի առկայությամբ, Ընկերությունը չի մատուցում՝

1. բանկային ծառայություններ,
2. ավանդների կամ այլ վերադարձման ենթակա միջոցների ներգրավում,
3. վարկերի կամ փոխառությունների տրամադրում,
4. արժեթղթերով ներդրումային ծառայություններ,
5. կրիպտոակտիվների փաթեթի կամ այլ ակտիվների կառավարում,
6. անհատական ներդրումային խորհրդատվություն,
7. երաշխավորված եկամտաբերությամբ ներդրումային արտադրանք,
8. Օգտատերերի միջոցների կամ կրիպտոակտիվների մշտական պահառություն,
9. ավանդապահ կամ դեպոզիտար ծառայություններ,
10. ապահովագրական ծառայություններ,
11. վճարային հաշվի կամ բանկային հաշվի բացում և վարում,
12. օրենսդրությամբ լիցենզավորման կամ հատուկ թույլտվության ենթակա այլ ծառայություններ՝ առանց համապատասխան իրավական հիմքի։

7.2. Ընկերության կողմից կրիպտոակտիվների, շուկայի, փոխարժեքների, տեխնոլոգիաների կամ գործարքների վերաբերյալ տրամադրվող տեղեկությունը կրում է ընդհանուր տեղեկատվական կամ գործարքային բնույթ և չի հանդիսանում անհատական ներդրումային, ֆինանսական, իրավաբանական կամ հարկային խորհրդատվություն։

7.3. Օգտատերը պարտավոր է անհրաժեշտության դեպքում ստանալ անկախ մասնագիտական խորհրդատվություն՝ հաշվի առնելով իր անձնական հանգամանքները, ֆինանսական հնարավորությունները և ռիսկերի նկատմամբ վերաբերմունքը։

8. Կարգավորող մարմնի հավանության կամ երաշխիքի բացակայությունը

8.1. Ընկերության պետական գրանցումը, հարկային հաշվառումը, կայքի գործունեությունը, որևէ պետական կամ մասնավոր կազմակերպության հետ համագործակցությունը կամ օրենսդրական պահանջների կատարումը չեն նշանակում, որ Հայաստանի Հանրապետության կենտրոնական բանկը կամ այլ պետական մարմին՝

1. հավանություն է տվել Ընկերության գործունեությանը,
2. հաստատել է Ընկերության գործարար մոդելը,
3. գնահատել կամ հաստատել է առաջարկվող կրիպտոակտիվների որակը կամ արժեքը,
4. երաշխավորում է գործարքների կատարումը,
5. երաշխավորում է Օգտատերերի միջոցների վերադարձը,
6. պատասխանատվություն է կրում Ընկերության գործողությունների կամ պարտավորությունների համար։

8.2. Ընկերության կողմից երրորդ անձի ծառայություններից օգտվելը կամ լիցենզավորված կազմակերպության հետ համագործակցելը Ընկերությանը չի փոխանցում տվյալ երրորդ անձի լիցենզիան, կարգավիճակը կամ լիազորությունները։

8.3. Երրորդ անձի լիցենզիայի, անվանման կամ տվյալների հրապարակումը վերաբերում է բացառապես տվյալ երրորդ անձի կարգավիճակին և չի կարող մեկնաբանվել որպես Ընկերության լիցենզավորման մասին հայտարարություն։

9. Միջոցների պաշտպանության պետական համակարգերի չկիրառումը

9.1. OurExchangeClub-ի միջոցով իրականացվող գործարքները բանկային ավանդներ չեն։

9.2. Օգտատիրոջ կողմից Ընկերությանը փոխանցված դրամական միջոցները կամ կրիպտոակտիվները չեն հանդիսանում բանկային ավանդ և չեն պաշտպանվում ֆիզիկական անձանց բանկային ավանդների հատուցումը երաշխավորող համակարգով։

9.3. Կրիպտոակտիվների արժեքը, իրացվելիությունը, փոխանցելիությունը կամ վերադարձը չի երաշխավորվում Հայաստանի Հանրապետության, Հայաստանի Հանրապետության կենտրոնական բանկի, որևէ այլ պետական մարմնի կամ ավանդների երաշխավորման համակարգի կողմից։

9.4. Կրիպտոակտիվներով գործարքները կարող են առաջացնել մասնակի կամ ամբողջական ֆինանսական կորուստ, և Օգտատերը պարտավոր է նախապես ծանոթանալ Կրիպտոակտիվների ռիսկերի բացահայտման հայտարարությանը։

10. Երրորդ անձանց ներգրավումը

10.1. Ընկերությունը կարող է իր գործունեության ընթացքում ներգրավել նույնականացման, վճարային, բանկային, ծրագրային, տեղեկատվական անվտանգության, հաղորդակցության կամ այլ ծառայություններ մատուցող երրորդ անձանց։

10.2. Յուրաքանչյուր երրորդ անձ գործում է իր իրավական կարգավիճակի, պայմանների, լիազորությունների և պատասխանատվության սահմաններում։

10.3. Երրորդ անձի ներգրավումը չի նշանակում, որ՝

1. տվյալ երրորդ անձը վերահսկում կամ երաշխավորում է Ընկերության ամբողջ գործունեությունը,
2. Ընկերությունը ձեռք է բերում տվյալ երրորդ անձի լիցենզիան կամ թույլտվությունը,
3. տվյալ երրորդ անձը պատասխանատվություն է կրում Ընկերության բոլոր պարտավորությունների համար,
4. Ընկերությունը պատասխանատվություն է կրում երրորդ անձի՝ իր ինքնուրույն գործունեության շրջանակում կայացրած բոլոր որոշումների համար։

10.4. Երրորդ անձանց վերաբերյալ լրացուցիչ տեղեկությունները կարող են ներկայացվել Օգտագործման պայմաններում, Գաղտնիության քաղաքականությունում, Վճարումների և կանխիկ գործառնությունների քաղաքականությունում կամ գործարքի համապատասխան էջում։

11. Օգտատիրոջ պատասխանատվությունը

11.1. Նախքան Կայքում գրանցվելը կամ գործարք ստեղծելը Օգտատերը պարտավոր է ծանոթանալ՝

1. Ընկերության ընթացիկ կարգավորող կարգավիճակին,
2. Օգտագործման պայմաններին և հրապարակային օֆերտային,
3. Կրիպտոակտիվների ռիսկերի բացահայտման հայտարարությանը,
4. կիրառելի փոխարժեքներին, վճարներին և սահմանաչափերին,
5. գործարքի կատարման և չեղարկման պայմաններին,
6. իրեն վերաբերող իրավական և հարկային հետևանքներին։

11.2. Օգտատերը չպետք է ենթադրի, որ Ընկերության ծառայությունից օգտվելը կամ նույնականացման գործընթացն անցնելը նշանակում է որևէ պետական մարմնի կողմից Օգտատիրոջ գործարքի, ֆինանսական վիճակի կամ որոշման հաստատում։

11.3. Օգտատերը կրիպտոակտիվների հետ կապված որոշումները կայացնում է ինքնուրույն և իր պատասխանատվությամբ՝ հաշվի առնելով իր գիտելիքները, փորձը, ֆինանսական հնարավորությունները և ռիսկերը կրելու կարողությունը։

11.4. Կասկածի դեպքում Օգտատերը պետք է մինչև գործարքի իրականացումը ստանա անկախ իրավաբանական, հարկային, ֆինանսական կամ տեխնիկական խորհրդատվություն։

12. Կարգավիճակի ստուգումը

12.1. Օգտատերերը կարող են Հայաստանի Հանրապետության կենտրոնական բանկի պաշտոնական կայքի և հրապարակային գրանցամատյանների միջոցով ինքնուրույն ստուգել՝ արդյոք Ընկերությանը տրամադրվել է համապատասխան գրանցում կամ լիցենզիա։

12.2. Լիցենզիայի տրամադրման դեպքում Ընկերությունը Կայքում կհրապարակի առնվազն՝

1. լիցենզիայի տեսակը,
2. լիցենզիայի համարը,
3. լիցենզիայի տրամադրման ամսաթիվը,
4. լիցենզավորված ծառայությունների շրջանակը,
5. Հայաստանի Հանրապետության կենտրոնական բանկի համապատասխան գրանցամատյանի հղումը,
6. լիցենզիայի նկատմամբ կիրառվող էական սահմանափակումները, եթե այդպիսիք առկա են։

12.3. Մինչև նշված տեղեկությունների պաշտոնական հրապարակումը որևէ աշխատակցի, ներկայացուցչի, գործընկերոջ կամ երրորդ անձի ոչ պաշտոնական հայտարարությունը չի կարող համարվել Ընկերության լիցենզավորված կարգավիճակի հաստատում։

13. Հայտարարության փոփոխությունները

13.1. Ընկերությունն իրավունք ունի փոփոխել կամ լրացնել Հայտարարությունը՝ պայմանավորված՝

1. Ընկերության կարգավորող կարգավիճակի փոփոխությամբ,
2. լիցենզավորման դիմումի ներկայացմամբ կամ դրա վերաբերյալ որոշմամբ,
3. օրենսդրական կամ կարգավորող փոփոխություններով,
4. մատուցվող ծառայությունների կամ գործարար մոդելի փոփոխությամբ,
5. Ընկերության նույնականացման կամ կոնտակտային տվյալների փոփոխությամբ։

13.2. Հայտարարության փոփոխված տարբերակը ուժի մեջ է մտնում Կայքում հրապարակվելու պահից, եթե դրանում ավելի ուշ ամսաթիվ նշված չէ։

13.3. Կարգավորող կարգավիճակի էական փոփոխության դեպքում Ընկերությունը կարող է Օգտատերերին տեղեկացնել նաև էլեկտրոնային փոստով, օգտահաշվի միջոցով կամ Կայքում համապատասխան ծանուցում հրապարակելով։

13.4. Օգտատերերին խորհուրդ է տրվում պարբերաբար ստուգել Հայտարարության արդիական տարբերակը։

14. Պաշտոնական հաղորդակցություն

14.1. Ընկերության իրավական կամ կարգավորող կարգավիճակի վերաբերյալ պաշտոնական տեղեկություն կարող է տրամադրվել միայն՝

1. Կայքում հրապարակված փաստաթղթերով,
2. Ընկերության պաշտոնական էլեկտրոնային հասցեներից ուղարկված հաղորդագրություններով,
3. Ընկերության կողմից պատշաճ կերպով լիազորված անձի գրավոր հայտարարությամբ,
4. իրավասու պետական մարմնի պաշտոնական հրապարակմամբ։

14.2. Սոցիալական ցանցերում, մեսենջերներում, մեկնաբանություններում կամ չհաստատված այլ աղբյուրներում հրապարակված տեղեկությունը չի համարվում Ընկերության կարգավորող կարգավիճակի պաշտոնական հաստատում։

14.3. Հայտարարության, Ընկերության իրավական տվյալների կամ կարգավորող կարգավիճակի վերաբերյալ հարցերը կարող են ուղարկվել՝ info@ourexchange.club էլեկտրոնային հասցեին։

14.4. Էթիկայի, շահերի բախման, կոռուպցիայի կամ այլ հնարավոր խախտումների վերաբերյալ հաղորդումները կարող են ուղարկվել՝ ethics@ourexchange.club էլեկտրոնային հասցեին։

15. Վերջնական դրույթներ

15.1. Հայտարարությունը հրապարակվում է Ընկերության պաշտոնական կայքում և հասանելի է բոլոր Օգտատերերին և շահագրգիռ անձանց։

15.2. Հայտարարությունը կազմվել և մեկնաբանվում է Հայաստանի Հանրապետության օրենսդրությանը համապատասխան։

15.3. Եթե Հայտարարության որևէ դրույթ ճանաչվում է անվավեր, անօրինական կամ չկիրառելի, դա չի ազդում մյուս դրույթների վավերականության և կիրառելիության վրա։

15.4. Հայտարարության հայերեն տարբերակը գերակա է այլ լեզուներով հրապարակված տարբերակների նկատմամբ։

15.5. Հայտարարությամբ չկարգավորված հարցերը կարգավորվում են Հայաստանի Հանրապետության օրենսդրությամբ, Ընկերության Օգտագործման պայմաններով, Կայքում հրապարակված այլ փաստաթղթերով և կիրառելի պայմանագրերով։